പത്തനംതിട്ട: 2031-ഓടെ സംസ്ഥാനത്തെ എല്ലാ പൗരന്മാർക്കും ആരോഗ്യ പരിരക്ഷ ഉറപ്പാക്കുകയാണ് സർക്കാരിന്റെ പ്രധാന ലക്ഷ്യമെന്ന് ആരോഗ്യവകുപ്പ് മന്ത്രി വീണാ ജോർജ്. ‘വിഷൻ 2031’ന്റെ ഭാഗമായി പത്തനംതിട്ടയിൽ സംഘടിപ്പിച്ച ആരോഗ്യ സെമിനാറിൽ ‘കേരളത്തിന്റെ ആരോഗ്യ മേഖല വിഷൻ 2031’ എന്ന നയരേഖ അവതരിപ്പിച്ചുകൊണ്ട് സംസാരിക്കുകയായിരുന്നു മന്ത്രി. കേരളത്തെ ഒരു ആഗോള ‘ഹെൽത്ത് ഹബ്ബാക്കി’ മാറ്റാനുള്ള പ്രവർത്തനങ്ങൾ ഊർജ്ജിതമാക്കുമെന്നും മന്ത്രി പ്രഖ്യാപിച്ചു.
സ്പെഷ്യാലിറ്റി ചികിത്സകൾ താഴെത്തട്ടിലേക്ക് എത്തിക്കുന്നതിനായി വികേന്ദ്രീകരിക്കും. ആശുപത്രികളിലെ അടിസ്ഥാന സൗകര്യങ്ങൾ മെച്ചപ്പെടുത്തുന്നതിനൊപ്പം ട്രോമ കെയർ, എമർജൻസി സംവിധാനങ്ങൾ കൂടുതൽ ശക്തിപ്പെടുത്തുമെന്നും മന്ത്രി വ്യക്തമാക്കി.
പ്രധാന ലക്ഷ്യങ്ങൾ:
- ആരോഗ്യ പരിരക്ഷ എല്ലാവർക്കും: നിലവിൽ 42.2 ലക്ഷം കുടുംബങ്ങൾക്ക് 5 ലക്ഷം രൂപയുടെ ചികിത്സാ പരിരക്ഷ നൽകുന്ന കാരുണ്യ ആരോഗ്യ സുരക്ഷാ പദ്ധതി (KASP) കൂടുതൽ ആളുകളിലേക്ക് വ്യാപിപ്പിക്കാൻ പുതിയ പദ്ധതികൾ ആവിഷ്കരിക്കും.
- രോഗപ്രതിരോധത്തിന് മുൻഗണന: ജീവിതശൈലീ രോഗങ്ങൾ കുറയ്ക്കുന്നതിനായി ‘ഹെൽത്തി ലൈഫ്’ ക്യാമ്പയിനുകൾ ശക്തമാക്കും. 30 വയസ്സിന് മുകളിലുള്ളവർക്ക് വീടുകളിലെത്തി രോഗനിർണ്ണയം നടത്തുന്ന ‘അർദ്രം’ ജനകീയ ക്യാമ്പയിൻ തുടരും. ക്യാൻസർ പ്രതിരോധത്തിനായി ‘ആരോഗ്യം ആനന്ദം അകറ്റാം അർബുദം’ എന്ന പേരിൽ നടത്തുന്ന സ്ക്രീനിംഗ് ഇതിനകം 20 ലക്ഷം പേരിലേക്ക് എത്തി. പകർച്ചവ്യാധി പ്രതിരോധത്തിനായി ‘എപ്പിഡമിക് ഇന്റലിജൻസ്’ സംവിധാനം വികസിപ്പിക്കും.
- മികവിന്റെ കേന്ദ്രങ്ങൾ: മെഡിക്കൽ കോളേജുകളെ പൂർണ്ണമായും ടെർഷ്യറി കെയർ സെന്ററുകളാക്കി മാറ്റും. ചികിത്സാ രംഗത്തും അക്കാദമിക് രംഗത്തും ഒരുപോലെ മുന്നേറ്റം ലക്ഷ്യമിടുന്നു. ആയുർവേദ രംഗത്ത് അന്താരാഷ്ട്ര നിലവാരത്തിലുള്ള ഗവേഷണ കേന്ദ്രം സ്ഥാപിക്കുന്നത് വലിയ കുതിച്ചുചാട്ടത്തിന് വഴിവെക്കും.
ആരോഗ്യ രംഗത്തെക്കുറിച്ച് ശാസ്ത്രീയമല്ലാത്ത തെറ്റായ കാര്യങ്ങൾ പ്രചരിപ്പിക്കരുതെന്നും മന്ത്രി അഭ്യർത്ഥിച്ചു. ആരോഗ്യ വകുപ്പ് അഡീഷണൽ ചീഫ് സെക്രട്ടറി ഡോ. രാജൻ എൻ ഖോബ്രഗഡെ, പ്ലാനിംഗ് ബോർഡ് അംഗം ഡോ. പി.കെ. ജമീല തുടങ്ങി ആരോഗ്യ രംഗത്തെ നിരവധി പ്രമുഖർ സെമിനാറിൽ പങ്കെടുത്തു.
